Bizkarraren arkitektura bikaina da. Zoragarri eraikia dago, baina, eraikuntza guztietan bezala, denboraren joanak eraso egiten dio, are gehiago ongi zaintzen ez badugu.

Bizkarreko minak oso ohikoak dira: biztanleriaren % 70 inguruk jasan ditu edo pairatuko ditu. Arrazoiak asko dira. Haietako batzuk ezin dira saihestu; beste batzuk, berriz, bai, eta haiekin prebentzio-neurriak har daitezke.

Liburuxka honek, beraz, helburu argia du: bizkarra zer den eta nola funtzionatzen duen azaltzea, eta hobeki zaintzeko aholkuak ematea. Faktore gehiago badaude ere, guk zainduz gero zailagoa izanen da oinaze eta minak agertzea.