Cochrane lankidetza Cochrane Lankidetza irabazi asmorik gabeko erakunde global bat da eta osasun arloko esku-hartzeak berrikusteko prozesu zorrotz eta sistematiko bat aplikatzen duten 90etik gora herrialdetako 30.000 boluntario baino gehiagoz osatutako osasun-zientzietako ikertzaile talde bat biltzen du.

Erakunde independentea, askotarikoa eta globala da, eta ebidentzia labur fidagarria sortzeko, mundu guztiari helarazteko eta erabilera sustatzeko elkarlanean aritzen da. Osasun arretaren eraginkortasunari buruzko kalitate handiko informazioan erreferentziazko baliotzat jotzen da nazioartean.

Cochrane lankidetzaren azken helburua honako hau da: osasun-arloko erabakiak eskura dagoen ebidentzia zientifiko onenean oinarrituta hartzea ahalbidetzea.

2015/05/06an, Nafarroako Gobernuko Osasuneko kontseilariak eta Iberoamerikako Cochrane Zentroak (CCIb) hitzarmen bat sinatu zuten. Hitzarmen horren arabera, Nafarroako Cochrane Zentro Elkartua eratu zen, Espainian dagoen Iberoamerikako Cochrane sarearen talde kolaboratzaile gisa. Geroago, Iberoamerikako Cochrane Zentroak eta Nafarroako zentro elkartuak –O-NOZeko Berrikuntza eta Antolaketa Atalean kokatua– lankidetza instituzionalerako hitzarmen bat sinatu zuten. Hitzarmena hiru urtean behin berritzen da.

Nafarroako Cochrane Zentro Elkartuak Cochrane Hypertension Group talde satelitea barne hartzen du. British Columbiako (Vancouver, Kanada) Unibertsitatean kokatuta dago azken hori.

• Nafarroan Cochrane lana sustatzea.

• Cochrane-ko kideen komunitatea babestea eta garatzea.

• Cochrane berrikuspenak toki mailan zabaltzea.

• Nafarroan Cochrane-ren ordezkari ofiziala izatea.

• Urtero ZEra atxikitako egileren batek egindako berrikuspen sistematiko bat gutxienez argitaratzea edo eguneratzea.

• Interes-taldeekin tokiko lankidetza formalak eta informalak sortzea, ezagutza-trukea eta Cochrane ebidentziaren hedapena hobetzeko.

• Maila nazionaleko kanpoko solaskideekin lankidetzan aritzea, Cochrane berrikuspenetarako lehentasunak ezartzeko.

• Cochrane berrikuspenak egiteko eskualdeko gaitasuna handitzea, egileei, editoreei, prestatzaileei eta bestelako kolaboratzaileei aurrez aurreko prestakuntza eta laguntza emanez edo ahalbidetuz.

• Cochrane-ren lana sustatzeko, kolaboratzaileen kopurua handitzeko eta interes-taldeekin loturak sortzeko ekitaldiak antolatzea, adibidez: eskualdeko edo nazio mailako sinposioak.

• Urteko memoria bat prestatzea eta CCIb-ri aurkeztea, eskatutako epeetan, une bakoitzean ezartzen diren jarduera-adierazleak bilduta.

• Ikerketa metodologikoa edo beste mota batekoa bere gain hartzea edo horretan laguntzea.

• Nafarroan Cochrane jardueren finantzaketa-oinarria zabaltzea eta dibertsifikatzea.

• Nafarroako Cochrane-ren eginkizuna, profila eta kanpainak babestea eta sustatzea.

• Bere erreferentziazko eremuan Cochrane jarduerak garatzeko behar den laguntza lortzea eta ZEko ordezkari bat gutxienez Sarearen urtean behingo bilerara eta/edo Cochrane Colloquiumera joatea finantzatzea.

Honako hauetarako prestakuntza eskaintzen dugu

• berrikuspen sistematikoak egiteko eta ebaluatzeko

• literatura medikoaren irakurketa kritikoa egiteko eta horrekin lotutako alderdietarako, hala nola GRADE (Grading of Recommendations Assessment, Development and Evaluation) tresna erabiltzeko

Prestakuntzarekin zerikusia duten beste zerbitzu batzuk:

• doktorego tesien, gradu amaierako lanen edo master amaierakoen zuzendaritza

• unibertsitateko aditu edo master ikastaroetako laguntza